انا كنت كاتبة كم موضوع عن فوائد الحلبة في رفع المناعة للاطفال وماانكر انه اطفالي الحمدلله تحسنو عليها خاصة بعد معاناة من الامراض والالتهابات اللي جاتهم في كل مكان بيخص مجرى التنفس والاذن وهادا غير حساسية الصدر وقضيت سنة تعب مو طبيعي معاهم من كتر ماكانو يتعبو معاي
وكنت متجاهلة مفعول التمر مع اني عارفة عن فوايده بس برضو مااكترثت له كتير
لحد مامرة كنت بفكر اغير لاطفالي وجباتهم بسبب ضعف اكلهم وتعبي معاهم في الاكل
وصرت اعمل لهم كاسترد بمعجون التمر مع الكويكر
ووالله وربي يشهد على كلامي انه حتلاحظو فرق كبير بعد ماتداومو عليه باذن رب العالمين
و طريقتي هي
احط في الخلاط تقريبا 4ملاعق شوفان كويكر العلالي و كمية كبيرة من التمر المعجون و ملعقتين غرف كبار حليب بودرة او حليب الطفل نفسه اذا كان تحت السنة وملعقتين غرف كبار كاسترد واخلطهم بالخلاط مع كاستين او 3موية دافية واغليهم على النار
واعبيهم في برطمانات القزاز حقت صلصة الطماطم حقت العلالي واخليهم في الثلاجة بيكفيني اسبوع كل يوم وجبة لكل واحد من توأمي
طبعا انا احطهم بالخلاط عشان اولادي مايحبو الشوفان يطلع لهم في اللقمة
وبالنسبة للاطفال تحت ال6شهور ممكن تشربوهم موية التمر
وطرريقتها
تمرة لكل 30مل موية مغلية وبس تبرد الموية تهرسيها بالشوكة وتصفيها وتحطيها بالرضاعة او البيبرونة بعد ماتكبري الحلمة حقتها شوي
وكمان بعمل مهلبية التمر اذا حبيت اغير لهم من الكاسترد وطريقته هي
بنفس طريقة الكاسترد بس بدل مااحط كاسترد بحط نشا وممكن تحلوه بالعسل <<<<بالنسبة لي انا مااحب اعطي اطفالي سكر وكل شي احليه بالعسل وعموما التمر حلاه كفاية وطعمه فظيع مرة
وجبت لكم صورة الشوفان
ودي صورة معجون التمر
وامانة لاتنسوني من دعواتكم لي بانه ربي يسخر لي زوجي ويجعلني قرة عين له ويبعد عنه بنات الحرام
وسامحوني اذا مقاديري ماهي دقيقة جدا لاني مااعرف اشتغل بالمقادير قد النظر والتذوق
[/CENTER]