*موضوع متميز*بالتفصيل … فراخ مشويه علي الفحم وشطيطه حراقه يجنننننننن -طريقة تحضير

جبتلكم انهارده طبق فراخ مشويه علي الفحم وعمل شطيطه وشرح بالتفصيل للي ميعرفش يشوي ، بصراحه الي علمني الشوي علي الفحم زوجي وهو استاذ شوي بس دي اول مره اشوي بنفسي بس كان معايا اخويا بصراحه بيساعدني

الطبق الأول ( فراخ مشويه علي الفحم )

2 فرختين بيضاء ( عشان سواهم اسرع في الشوي وافضل ) مقطعين اربع
5 بصلات
1 حبه طماطم
قرن فلفل احمر حراق ( للي يحب الحراق )
عصير ليمونه كبيره
نصف كوبايه صغيره خل
ملح وفلفل وبهارات فراخ وبشر نصف حبه جوزه الطيب و علبه زبادي

تخلط الخلطه وتضرب في الخلاط او الكبه ، نغسل الفراخ جيدا ونشق فيها شق صغير ونصفيها من ميتها كويس بعد الغسيل وباخد ربع ربع واحط فيه خلطه تحت الجلد وفي الشق وهكذا حتي ننتهي ثم نضعها في الثلاجه لمده يوم او يومين ( لتتشرب الخلطه جيداااااا )

احنا استخدمنا للكميه دي كيلو فحم يكون نوعه نظيف ، وباخد حوالي 8 حبات منه وعلي نار البوتاجاز اسخنه لحد مايتوهج وباخدهم وبحطهم علي باقي الفحم الي في الشوايه ودي اسرع طريقه نقدر نولع او نشعل بيها الفحم كويس والفحم بيشعل بعضعه البعض والصوره الاولي هتقدرو تلاحظو ده ان في كام واحده بس همه الي لونهم ابيض شويه او محمرين ، المهم بنبدا نهوي بالهوايه كويس جدا جدا ايدكو هتوجعكو بس معلش النهايه احلي بكتيررررررررر تفضلو تهو بالهوايه كويس جدا وبالماسك تنقلو الفحم حول المشتعل عشان كله يشتعل وهتلاحظو اكيد في الصور ان مفيش تقريبا فاحمه ثابته في اي صوره في مكانها وبنفضل كده شويه لحد مانلاقيه كله احمر وكله مشتعل زي مافي الصوره ( ممكن يطلع نار في النص خفيفه فنهدي التهويه شويه لحد ماتروح ) ، وبعد كده بنكون مجهزين رف الشواء وفي شوايات بتكون ليها زي دورين انا بحط الرف في الدور اليعلوي عشان متحمرش بسرعه وتكون لسه مستوتش وانا هنا جبت فوق الرف زي شبكه ماسك للمشويات واضح في الصور عشان يسهل قلب المشويات بسهوله ، وبنرصص الفراخ وتكون مقلوبه وبعدين بنقلبها من الحين للأخر لحد ماتستوي وممكن نعمل شقوق مره تانيه خلال فتره الشواء بسكين رفيع عشان تستوي كويس

ودي الصوره لما استوت كويس صورتها علي الشوايه

ودي وصفه قالتلي عليها حماتي وعجبتني جدا وطعمها رائع جدا وخفيف جدا وحرااق جدا

حوالي 3 بصلات متوسطين
2 حبه طماطم
راس ثوم صغيره
وقرن فلفل احمر حراق
رشه خل
رشه ملح وكمون

بقطع اربع كل المكونات دي وبحط عليها الملح والكمون والخل وبحطها في ورقه فويل واقفلها كويس جدا جدا وبحطها تتشوي علي الفحم مع الفراخ ، وبعد ماتتشوي كويس جدا باخد الخلطه واضربها في الكبه ولو احتاجت بهارت تاني نحط
، ودي طعمها رائع جدااااااااا مع اي حاجه مشويه والصوره هتعرفو منها الطريقه ، وممكن تزودو فلفل رومي اخضر واحمر واصفر لو حبيتو بس مكنش عندي للاسف

عملنا كمان عيش علي الفحم رائع

وجمب الفراخ فيه مكرونه بصلصه طماطم

مستنيه ردودكم ورأيكم بصراحه ، متتصوروش تعبت قد ايه وانا بصور بالذات الاكله دي لانها كلها دخان وموبايلي اتبهدل بس عشان خاطركم انتم وبس ، واكيد ردودكم هترضيني