كيفكم انشا الله بخير00
انا راح احكيلكم مشكلتي مع زوجي 
يمكن ماراح تحسو انتم انها مشكله , لاني انا بالبدايه ماحسبتها بتاثر على
حياتي لهدرجه, ولاراح تصدقون انها عكرت صفو حياتي واثرت سلبا على حياتي كلها00
انا زوجي صامت بمعنى الكلمه مايتكلم ولايسولف فيه اشياء كثيره تصيرله والله ماادري عنها الا من اهلي او اهله
لا وفوق هذا كله مايتفاعل مع الكلام اذا انا كلمته احيانا اشك انه يسمعني واذا سالته : انت معي ؟؟ مايرد ويكتفي
بتحريك راسه بالايجاب
لا واوقات كثيره انا اكلمه وهو يطالع التلفزيون , يعني اتحطم اذا كلمته
والله لو تشوفوننا واحنا نتكلم تقولون هذي تهرج نفسها وهو مايسمع
واذا طولت اهرج (اتكلم) يجلس يتنهد كان هموم الدنيا على راسه , اما اذا ابي اناقشه بموضوع تعالو شوفو
اسحب الكلام منه يتكلم كانه يطلع الكلام من بطنه وغالبا تنتهي المناقشه بزعل مني وثوره عارمه وعصبيه
منه00
يمكن يجي ببالكم انه مايحبني او مغصوب علي , بس المصيبه اني عارفه اشكثر يحبني 
ولاهو مقصر معاي باي شي
لامن الناحيه الماديه ولا الطلعات والجيات, بس هو كذا دايما ساكت اكره شي عليه الكلام لو نجلس طول جلستنا
ساكتين ماعنده اشكال ابدا , ومو بس هو اللي كذا اهله كلهم كذا تصدقون اني نادرا مااشوفهم يضحكون او يمزحون
حتى ان امه تخاصمهم اذا شافتهم فرحانين وتقوله لاتفرح (مو بزين) ليش ؟؟ ماادري
والمصيبه انهم عكس اهلي تماما لان اهلي ماتشوفونهم يتكلمون جد الا احيانا كله مزح وضحك,,
وانا مااعرف اسكت (ثرثاره) والمشكله اني ساكنه بعيد عن اهلي وبوسط اهله وماني قادره اتاقلم مع الوضع
وجاتني فتره ادمنت على الشات لكن الحين تركته والحين يادوب ماسكه نفسي عنه لدرجة اني احلف على نفسي
اني لو دخلت الشات راح اصوم ثلاثه ايام00
بس حبيت افضفض لكم وياليت لو الاقي عندكم حل مع اني مااعتقد ان فيه حل ينطق زوجي00
عذرا على الاطاله00
