شمعة تنور وسط الظلام
تيجي وراها اتنين ، تلاتة
النور كتر وبزيادة !
وايه الجديد ما هي مصر ولادة !
وصوت بيهتف وسط الزحام
صوت مصري أصيل ..
عاشق لأرضه ولبلاده
صوت كسر الأقفال
واتسرب النور لأولاده وأحفاده !
صوت فتح الأبواب ، فتح الشبابيك
طلينا ع الحرية !
بصينا كده مبهورين
مصر اتغيرت وفـ ثانية
ثانية بطول سنين القهر ..
سنين ظلم وقسية
وفتحت عينينا بعدها
لقينا الشمس تضحك لنا تبتسم !
تهتف بعالي الصوت :
أخيرا يا مصريين !
بعد الآلام ، بعد الأسى والدم
بعد أما الياس يستحكم ..
تتحقق الأحلام !
يرجع يتصنف المصري بقى إنسان !
" ارحل يا ظلم " صرخنا ..
مبقاش ليك بيننا أي مكان !
"يا مصر مبارك "
لأ .. متفهمونيش غلط
أقصد
يا مصر مبارك الحرية
مبارك التحرير
لأ برضو مش نافعة !
يا مصر مبارك الظلم رحل
أيوا كده اتظبطت ..
ولما جينا قلبناها ، اتقلبت !
الظالم لزوم ليه يوم
لو الدنيا قامت ولا اتهدت !
لو طالت سنين القهر ..
لازم هييجي يوم تلاقي الحرية اتكتبت !
انسى بقى الأوهام ..
انسى بقى الآلام
دي مصر اتولدت !
كانوا يقولولنا في البلد دي :
ما تبقاش نضيف .. هوا " نظيف " واحد
ما تبقاش شريف .. هوا " شريف " واحد
خليك وِحِش واطي ، هما الـ " جمال " ، هما الـ " علاء " .. واحد
انسى بقى عزك .. ما الـ " عز " احتكروه !
ومش هترجعوا تاني تاخدوه !
خلاص بقى ..
حيلي أنا اتهد ، " عزمي " أنا راح !
عيب يا ولد ، عزمي ما بيروحشي !
ارموه في القسم .. عذبوه ، يمكن يختشي
واللي هيصمد ف البلد دي ومايموتشي ..
يبقى أكيد إرهابي ، حشّاش ، مرتشي !
لبسوه أي تهمة بقى متفرقشي ..
ده حيا الله حتة ولد
وفي غيره كل يوم ميات بتتولد !
علموهم يعيشوا حيطة عليها لوح سهام
وناس بترمي الهدف ، بس ما بتنشنشي ..
ترمي في أي مكان ..
خلي المسائل تمشي !
والحيطة غلبانة
ساكتة وشقيانة
ناس علموها إن الظلم بقى هو المباح !
لحد اما خلاص .. اتملت هيا جراح !
جت تنتفض ..
تخلع من جواها السهام
قالولها هتنزفي كتير لما تحاولي تخلعيها
وهتندمي لو في يوم فلت منا الزمام !
قالت : خلاص
دمي خدوه فدية !
وسلموني بقى أمي !
هتكبروها ليه وتعملوها قضية ؟
خدو روحي خدو دمي
أنا دمي ده ولا حاجة لما يتقال مصر !
ده دمي ده حبر
يتكتب بيه تاريخ كل عصر !
أنا روحي هيا المية ..
والشجرة حرية !
والدم يرخص لجل ما وطني
يدوق ثمرها مني هدية !
تسنيم
28-4-2017
أولى محاولاتي الشعرية
