اولا استخدمي مقدار الكوب الي هوه كوب الماء العادي الي ما يزيدش عن 250 مليلتر
مقادير العجينه :
½1 كوب دقيق ابيض
½1 كوب دقيق بر (اسمر)
2 ملعقه لبن بودره
ربع كيلو زبده صفرا
1 ملعقه كبيره خميره فوريه
1 ملعقه سكر كبيره
ذره ملح
مقادير الحشو:
1 علبه تونه قطع نوع كويس مش مفتته وتكون مصفاه جيدا من الزيت
4 خيارات كبار مقطعه صغيره جدا
3 ملاعق كبير بقدونس مفروم
2 فص توم كبير مفروم (فص مش راس)
3 ملاعق مايونيز كبيره
كمون وملح انتي ومزاجك
الطريقه:
اخلطي الخميره مع السكر ونصف كوب ماء دافئ (مش مغلي) واتركيها حتى تخمر
ضعي الدقيق الابيض مع الاسمر ثم الحليب البودره وذره الملح واخلطيهم شويه مع الزبده يعني مش لازم تعجينيها اوي خلط عادي
بعد ما الخميره تخمر حطيها عليهم واعجنيها اذا احتاجت ميه اوكي حطي ميه دافيه اذا ما احتاجتش متفتيش بس اكيد هتحتاج لحد ما تبقى عجينه مزبوطه
وانتو عارفين شكل العجينه السليمه ازاي يعني ما تلزقش اوي في ايديكي ولا تخليها حجر تخبطيها في الجار تنكسر … عجينه عاديه
بعد كده حطيها في كيس بلاستيك وحطيها في مكان مش بارد
يفضل الفرن لانه بيبقى مقفول بس ميكونش الفرن كان شغال
سيبيها تخمر وتعالي اعملي الحشو
حطي مقادير الحشو كلها على بعضها وخلي الملح والكمون اخر حاجه يعني قبل الحشو مباشره
بعد ما العجينه تخمر
افرديها بالنشابه لحد ما تبقى سمكها اقل شويه من ½ سم وهاتي قطاعه الي قطرها 4 سم او اسهلك زي ما انا بعمل قطعيها دوائر بفنجان صغير
اقليها في زيت غزير وطلعيها على ورق مناديل محطوطه على مصفى عشان يشفط الزيت
بعد ما تخلصي القلي سيبيه يبرد شويه وافتحيها من الجنب يعني من محيط الدائره لحد النص بس (مش تقسميها خالص)
هاتي معلقه صغيره وحطي الحشو( متنسيش تحطي الملح والكمون) في البتاعه المدوره الي هيه العجينه الي قليتيها بعد ما تفتحيها
هيبقى شكلها عامل زي الصدفه المفتوحه
رصيها في طبق وقدميها لاغلى الحبايب هياكلو ايدهم وراها (بس جهزي عربيه الاسعاف) بس هيدعولك
ومتنسيش تدعيلي والف هنا وشفا
ملاحظه :
ممكن تستخدمي بدل التونه لحم مفروم
تجيبي ربع كيلو لحم مفروم
و1 بصله كبيره مفرومه وتحطيهم على النار لحد ما الحمه المفرومه تستوي وحطي شويه ملح وفلفل اسود واستخدميها بدل التونه
بس انا لما جربت لقيت طعم التونه ازكى
يله جربوها وقولولي النتائج
