في يوم من الايام الله لايعيده خرج ابني البالغ اربع سنوات من المنزل ليلا كانت الساعه تقريبا اثناعشر منتصف الليل بعد ماأخذ المفتاح من تحت راسي وانا في سبات عميق وكنت وقتها في النفاس وانتو تعرفون نومة النفاس كأن لها سنه مانامت المهم مادريت إلا وصوت الجرس يرن طبعا جرس عالي والبيت شقه قمت مفزوعة من جاي ذا الوق طلعت للصاله لقيت ولدي جالس ويقول ياماما شووفي من عند الباب وكنه ماسوا شيء واتاريه رجال قال انتبهي للولد انا شفته طالع برا رايح يشتري حلاوة بنص الليل وجبتة معاي انا بغيت انهبل ولدي يخاف خوف ماعمري شفت احد يخاف مثله حتى اذا قلت له وانا بالبيت روح الغرفة الثانية مايرضى ماادري كيف اتجرأ وطلع مع الباب المهم تشكرت للرجال ودعيت له ولاهله ولقبيلته ان الله يحفظه ويستر عليه ويفتح بوجهه وين ماراح ورجعت لولدي وضربته كثر حبي له وبالاخير جلست ابكي وابكي واقول طفلي بغى يضيع مني وكل مااناظر وجهه اعيد السالفة وابكي وتذكرت تذكرت كلمة قالها لي زوجي الله يحفظه عمري ماراح انساها كان حبيبي دايما يتصدق ويفك زنقات واقوله ليش انت تعطي الناس دايا قال علشان ربي يحفظ اولادي ومن ذا اللحظة تأكدت ان ربي حفظ ولدي ورجعه لي بس لان ابوه يتصدق والصدقه تدفع البلا وتحفظ النفس والمال والا من كان يصدق ان طفل بهذا العمر يطلع في مثل هذا الوقت ولايضيع ويرجعه لي انسان يخاف الله
انا كتبت هالقصة للعبرة كل ام لازم تنتبه لعيالها ولاتغفل عنهم لو لحظة واوجه ذا الكلام لنفسي كأم من ضمن الامهات وتصدقو لو بالشيء القليل علشان ربي يحفظ اولادكم من كل شيء وادعي الله انه يصلح ذريتي وذريتكم والسلام ختام
