انا مش عارفة أقول لكم ايه يا بنات بجد بعد وقفتكم معايا في موضوع مازن ابني لما اتولد بشفة أرنبية
شكرا لدعواتكم ليا و لمازن
انا ماحبتش أدخل الا و عندي أخبار حلوة قعدت أقول لنفسي كفاية انك نكدتي عليهم كده
امبارح رحنا للدكتور الجراح و قال انه هيعمل لمازن العملية يوم22/5 ان شاء الله
و ياااااااااااااارب يبقي كويس
و بالنسبة لموضوع القلب
عايزة أشكر حبيبة قلبي ريحانة القدس لأنها نبهتني لموضوع القلب ده لأنه هون عليا كتير لما قالوا هيعملوا اشعة علي القلب لو ما كانش عندي اي فكرة سابقة كان يمكن أموت فيها و الحمد لله
ففعلا طلع عنده ثقوب في القلب و الدكتور قال نستني شهرين يمكن تلم لوحدها او يحتاج عملية واحنا في الانتظار و انا واثقة من رحمة ربنا و راضية بكل حاجة
اللهم لك الحمد كما ينبغي لجلال وجهك و عظيم سلطانك
و لغاية وقت العملية هتكون فيه متابعة كل 3 أيام تقريبا مع دكتور الأطفال بتاعه لأن طبعا لسة فيه شوية حاجات منها الصفرا و موضوع الرضاعة لأنه بيتخنق و يزرق مني و بتبقي روحي هتطلع و قلبي هيقف
بس الحمد لله ان شاء الله فترة و تعدي اوعوا توقفوا دعاء لمازن
خلوا بالكم من نفسكم كلكم يا بنات
و فعلا الكل بيستغرب حتي الجراح قال غريبة جدا مفيش اي سبب لحصول الموضوع ده عندك او عند والده و قعد يقول سبحان الله انا مش عارفة أقول لكم ايه
الدكتور بتاعي انا بقي قال نفس الكلام يوم الولادة و قال مفيش تفسير غير ان دي عين
عشان كده ارقوا نفسكم يا بنات انتم و البيبهات بتاعتكم
يا رب تقوموا كلكم بالسلامة انتم و البيبهات بتاعتكم و بكل صحة و كل واحدة فيكم تروح بيتها و البيبي بتاعها في حضنها
اللهم امين
و بالنسبة لأنه ما ظهرش في المتابعة فلأني مش عملت سونار رباعي هو اللي بيبين الحالات اللي زي كده و بعدين لما سألت لو كنت عرفت كان ايه اللي هيحصل؟
قالوا ولا حاجة هتفضلس متنكدة لأخر الحمل و بس
فحمدت ربنا اكتر انه رحمني
خلوا بالكم من نفسكم يا بنات و ان شاء الله سأوافيكم بكل جديد و ان شاء الله خير
