عارف انى بكون سعيدة جدا و انا بسمعك بتتكلم عن حاجه مدايقاك و تفضفض و اقدر اشيل همك و ترتاح بعد ما تكلمنى
عارف انى بحس بنوع من الغرور اللذيذ لانى الوحيدة اللى لما بتكلمها بتخلى نفسيتك احسن
عارف انى بيكون ورايا حاجات كتير اوى بس باجلها عشان اقعد اكلمك و اسمع رايك
عارف ان حديثنا لما بيكون جاد جدا و يتخلله فى النص طرفه او نكته بتخلى الحديث مهما كان مرهق وممتلىء بالمشكلات ممتع و عميق و له اثر ايجابى جدا
عارف انى مقدرش اتخيل انك ممكن تحكى لحد تانى !!
اوعى تفتكرها انانية بس انا متأكدة ان محدش هيسمعك زيي ولا يحس بيك ادى
عارف انا لما بتخنق منك جدا بلاقى افضل وسيلة عشان ادايقك ايه ؟
انى متكلمش معاك
متسمعش صوتى ولا تشوف ضحكتى 
وعارف كمان انى لما الضغوط تزيد عليا مبلاقيش حاجه تريحنى اد جلسة طويلة معاك نتسلى بالدردشة فيها مع كوبايتين شاى ولب وسودانى ونوجه و نتكلم فى اى كلام حتى لو مش مهم 
عارف ان الكلام معاك متعة مش ممكن اقدر اتخيل حياتى من غيرها
عارف اننا مهما بعدنا عن بعض بيكون عندى يقين ان صداقتنا اقوى من اى بعاد ؟
وانها مهما بعدنا هتخلينا دايما قريبين
اعرف يا صديقي الجميل ان الحياة طاحنة و ضغوطها متزايدة و صوتها صاخب مؤذى
لكنى اعطيك عهدا بأننى ساكون دوما الرافعة التى توقف الطاحونة
وبؤرة التنفيس التى تقلل الضغط
ومفتاح التحكم الذى يجعلك تنعم ببعض الهدوء
واعرف انك ستكون دوما لى المثل
فكن دائما بخير يا صديقي يا زوجى الحبيب
