انا عايزة افضفض بجد وعايزة رأيكم ..
وبتأسف مقدماً لان اللى هقوله ممكن يكون مش مترتب او ممكن متفهموش بسهوله
لعدم تنظيمه فاعذرونى ..لان زى ما قولتلكم دى ((فضفضه))
الموضوع وما فيه انى كنت مرتبطه بشاب خلوق جدا والحمدلله …
ومن فتره بدأت التـــزم واتدين
وبقى دينى وربى فى المقام الاول عندى وبدأ يبقى ليا نشاطات تطوعيه …
ومن ضمن الحاجات اللى كان لازم ابعد عنها , ارتباطى بالشاب ده ..
قولتله انا هسأل شيخ فى موضوع ارتباطنا ده واللى هيقوله انا هعمله
لان ساعتها مكنتش متأكده
100% ان الموضوع حرام (زى ما قولتلكم كنت لسه فى بداية التزامى) …
وبصراحه لما قولتله كده رده حببنى فيه اكتر قالى ((الموضوع ده لو طلع حرام
فعلا انا مش عايز
اكلمك تانى ولا اشوفك حتى ، انا مقدرش ارتكب ذنوب واشيلك انتى كمان ذنوب))
قولتله خلاص انا هسأل وربنا يسهل ..
وسألت فعلا دار الافتاء وقالولى ((حرام وعجلوا بالزواج افضل لكم …))..
وظروفنا طبعا لا تسمح بالزواج حاليا خالص ..احنا لسه بندرس وقدامه لسه
سنه كمان وينهى الدراسه بس لسه فيه جيش وشغل والحوار ده …
فمكنش قدامى حل غير انى اسيبه …
اليوم ده صليت ركعتين قبل الفجر ودعيت ربنا جامد انه
يساعدنى ويدينى القوه انى اقوله
لازم نسيب بعض …
وفعلا اتصلت اليوم اللى بعده وكنت خايفه جدا افاتحه فى الموضوع ..
وفوجئت انه قال كل اللى كنت عايزة اقوله لانه سأل شيخ وعرف واتأكد انه حرام …
وبقى كده مفيش قدامنا غير الحل ده وفعلا سبنا بعض …
المشكله ان الموضوع بالنسبالى انا وهو مش سهل ..
احنا كنا بنحب بعض جدا وعمرى فى حياتى
ما شوفت عقليه وتفكير وثقافه زى اللى فيه …
انا مش بقول الكلام ده على اساس انى عايزة ارجعله ابدا والله …
زى ما قولت الحمدلله رضى ربنا عليا فوق اى حاجه …
بس انا حاسه اننا اتسرعنا ..يعنى اعتقد المفروض كنا صلينا استخاره ..لو الموضوع
ده فيه خير و لينا نصيب لبعض وربنا وضحلنا ده من الاستخاره انا على اتم استعداد انى
استناه ولما يبقى جاهز يتقدملى ..وبردو مش هنكلم بعض ..مجرد انى استناه بس..
ولو ملناش نصيب خلاص انسى الموضوع اصلا ولو حد اتقدملى غيره اوافق ..
انا بقالى تقريبا 5 ايام من يوم ماسبته …
فكنت بفكر اتصل بيه واقوله على موضوع الاستخاره ده …عشان اعرف استناه ولا لأ..
وفى نفس الوقت خايفه فكرة صلاة الاستخاره دى تكون مدخل من الشيطان..
يعنى ميكونش تفكيرى او اعتقادى انا ..!!!
انا مش عارفه انتوا فهمتونى ولا لأ ..
يارب تكونوا فهمتونى وتقدروا تفيدونى …
عموما انا حاسه انى ارتحت شويه بعد الرغى ده ..ومعلش على طول المشاركه
وعدم ترتيبها …
وفى انتظار رأيكم ،
