السلام عليكم يا صبايا يا غاليات
كمشة اطباقي لليوم ان شاء الله تكون سهلة و على ذوقكم
الارز بالبازيللا
هذا الطبق بحبوه الصغار كثير كثير و برضه سهل كثير, كنت عاملة يومها برياني لحمة خروف و عملت للصغار رز بالبازيللا
الطريقة و المقادير:
– لحمة عجل مقطعة راس العصفور او اصغر شوي مقلبة بشوية زيت و بعدين مسلوقة بماء كافي لغمرها فقط و مطيبة بالبصل وورق الغار و الهيل و القرفة و الملح و الفلفل الاسود
– نغسل كمية من الارز البسمتي و ننقعها بماء دافيء 15 دقيقة + ملعقة صغيرة كركم ( لللون و للنكهة)
– في الطنجرة نضع قليل من الزيت و نقلب فيه كمية من البازيللا ثم نضيف قطع اللحم و الارز المنقوع بعد تصفيته + مكعب ماجي + ملح و بهار و قرفة و نفلفل الرز بماء سلق اللحمة و على الاغلب رح نحتاج ايضا ماء مغلي . يفلفل مثل الرز العادي
– قدمته مع اللبن بالنعناع و الثوم و الكزبرة
برياني لحم الخروف
استعملت لحم الخروف الهندي المقطع صغير نسبيا و عملت و صفتي المعتمدة بس خليت اللحم على النار مدة اطول و ضفت للحم 12 كاس ماء
الفاصوليا البيضاء بالدجااااااااج
بعرف انه الفاصوليا لازم باللحمة بس انا مش من عشاق اللحمة و خصوصا لما تكون شقف فجربتها بالفاصوليا و طلعت تحفة!
الطريقة:
– تنقع الفاصوليا بماء و بيكربونة قبل بليلة حتى تطرى
بصراحة استخدمت معلبة ( بس بدون مواد حافظة)وكانت الحبات مش مخبصة و هامطة كانت ممتازة
– نقطع صدور الدجاج قطع متوسطة و نقلبها في القليل من الزيت حتى تتحمر ثم نضيف بصلة مقطعة و نقلب
– نضيف للدجاج ملح + فلفل اسود + قرفة + هيل + ورق غار+ شوية مستكة +بهارات دجاج او كاري
– نضيف حبات الفاصوليا و نقلب + 5-6 ملاعق رب بندورة
– نضيف ماء مغلي حتى نغمر المكونات كلها و نتركها تغلي حوالي 35 دقيقة و تستوي المكونات و تتسبك الصلصة جيدا
– قبل التقديم في قليل من زيت الزيتون نقلي 3 فصوص ثوم مهروس + كمشة كزبرة و نحرك نصفها مع الصلصة و الباقي نوزعه على الوجه.
البطاطا المحشية على ايدامها
هذه من اكلات العائلة اللي بنسويها يوم العيد , بدها عضلات طبعا لحفر الكوسا فشدوا حيلكم!!
الطريقة:
– نقشر حبات البطاطا متوسطة الحجم ذات الشكل الدائري و ننقرها في منقرة الكوسا و نحتفظ باللب
– نقلي حبات البطاطا حتى تحمر
– نقلب لب البطاطا في قليل من الزيت في طنجرة و نملح ونبهر بالقرفة + مكعب ماجي
– نحضر الحشو من لحمة العجل المفرومة على اليد و المتبلة بالبصل و الهيل و القرفة و الملح و الفلفل(نسويها في قليل من الزيت)
– نحشي حبات البطاطا بالحشو ونصفها فوق اللب
– نغطي حبات البطاطا بالماء المغلي ونترك الطنجرة تغلي حوالي ربع ساعة حتى تستوي البطاطا
– يضاف 3-4 اسنان ثوم مهروسة +كمشة كزبرة وتترك لتغلى غلوة
عند التقديم نرش الوجه برشة قرفة خفيفة
ان شاء الله المجموعة تعجبكم , ادعوا لي ودمتم سالميييييين
