*موضوع متميز*لعيون احلى النواعم ولعشاق الباذنجان كباب الباذنجان وصل بالصــور من مطبخي

وعدت حبيباتي سيدات المطابخ اني نزل كباب الباذنجان باقرب فرصة
وخصوصا للعسولتين ام ليانة ولبنا ن وحبايبه الي مشتاقتلها موت وما بعرف وين غاطة

وهلق هاي انا عم اوفي بوعدي باذن الله ورح قدم كباب الباذنجان او بالباذنجان ما بتفرق بس بحلب بيقولو كباب بالبانجان (وهاي باللهجة الحلبية كمان هههه)

وهو طبق شهي كتير ودسم وببيض الوجه بالعزايم
المقادير
نصف كيلو باذنجان
حبتين بندورة
ملعقة دبس بندورة (صلصة الطماطم )
نصف كيلو لحمة كبابة

(مع الانتباه بعض اللحامين بملحو الكبابة وبهاي الحالة استغني عن اضافة الملح للطبخة )
حزمة بقدونس
كوب مكسرات محمصة او مقلية (استخدمت جوز وصنوبر )
ملح و بهار مشكل (انا باستخدم بهار حلو وفلفل اسود مع ملعقة صغيرة سبع بهارات )
ثوم مفروم بشكل طولي حسب الرغبة
للزينة
فليفلة ملونة مقطعة حسب الرغبة ومكسرات مقلية (استخدمت الكاجو للزينة باعتبار استخدمت الجوز والصنوبر للكبابة )
الطريقة
يغسل الباذنجان جيدا ويقطع حلقات ويوضع في ماء مملح لمدة ساعة
تبشر البندورة وتخلط مع الدبس في صحن مع اضافة رشة صغيرة ملح
ويفرم البقدونس ناعم
يقلى الباذنجان في زيت غزير بعد انا يصفى

او ممكن في صينية كبيرة توزعي حلقات الباذنجان وتحطي ع كل وحدة قطعة صغيرة من الزبدة كمان في الصورة وتدخليها الفرن حتى تتحمر او تصبح شبه مقلية

تدعك الكبابة مع البقدونس والملح والبهارات والمكسرات

ترتب الكبابة مع الباذنجان في صينية بالتناوب وضروري التناوب من شان الباذنجان يتشرب طعم الكبابة

يرش الثوم المفروم طبعا انا ما استخدمت كل الكمية الي بالصورة لانو طلعت كتيرة وبعدها رتبت الفليفلة الملونة

وبالاخر خليط البندورة

وتدخل الفرن مدة ساعة تقريبا ع حرارة 200 والفرن من الاسفل فقط
وبعدها ربع ساعة من الاعلى والاسفل وبتكون الطبخة جاهزة

وبتقدميها مع اللبن بتوم والارز بالشعيرية والفليفلة الخضراء الحـــــــــــــــــــــــارة
وبالهناء والعافية