النهارده كنت فى زيارة لصديقة طفولتى و قدمتلى القرص الشهيرة اللى باليانسون و الشمر و كانت لذيذة جدا و طرية و هشه ايضا
و اخدت منها المقادير و الطريقة عشان اعملها و للاسف حصل حاجتين افسدوها فى رايى او مدتنيش النتيجة ال ترضينى برغم انها عجبت زوجى
اولااسفل القرص احمر قبل ما تستوى رفعتها فى الرف الاوسط " كنت حاطاها على الشبكة تحت" و خفضت الحرارة قليلا و قلبتها عشان تستوى دا كان اول صاج
التانى بقى برغم انى حطيتها على طول فى الرف الاوسط و الحرارة زى ما هى الا انه بردو القعر احمر قبل ما تستوى و بردو قلبت القرص الا انها استوت بشكل افضل ما الصاج الاول
كمان بعد ما الصاج الاول برد نشف
و انا محبطة جدا دلوقتىو عاوزة اعرف العيب فين
المقادير ال استخدمتها كالتالى
كيلو دقيق مع ربع كيلو سمن مع كوب سكر ذرة ملح خميرة فورية " متهيئلى الخميرة ممكن تكون السبب ؟ " مع ثلاث ملاعق زيت ذرة ماء دافىء للعجن
نخلت الدقيق و اضفت له السكر و ذرة الملح و بسيت معاه السمن لغاية ما اختفى وضيفت الخميرة بعد ما كنت مدوباها فى سكر و ماء دافىء و عملت رغوة وفيرة
وبعدين عجنت بالماء الدافىء لغاية ما تكونت معايا عجينة رائعة والله كانت و لا تلتصق بالايدى و ملمسها حلو جدا
سيبتها تخمر نص ساعة فى المطبخ وبعدين ابتديت اشتغل فيها اكورها و ابططها شويه و ارصها فى الصاجات و سيبتها تخمر فى الصاجات كمان نص ساعة و بعدين دخلتها الفرن وحصل اللى حكيتلكم عليه من شويه
يا ترى بقى انا غلطت فى ايه
و بانتظار الوصفة منكم بردو
" انا محطتش يانسون ولا شمر لان ولادى مش بيحبوه"
