أنا أم لطفلين حسن 4 سنوات ونصف وعبد الرحمن 20 شهر … المشكلة إننا مغتربين حديثا بالولايات المتحدة وآه من الغربة وما أدراكم ما الغربة… من ساعة ما جينا وأنا مكتئبة جدا أحن لأمى وأبى وعيشتى فى مصر لكن…. ما باليد حيلة ومش هينفع ننزل مصر قبل عام آخر وعليكم خير… المهم إنى عصبية جدا مع الأولاد بسبب ما أنا فيه وبأطلعه عليهم وأشعر إن الأولاد كرهونى … حسن كان فى المدرسة بمصر فلما جيينا هنا مدخلش مدرسة السنة دى لكن أنا بأحاول معاه فى البيت شوية يستجيب وشوية لأ…. أخاف مووووت على العربى والدين وأحاول أحفظه القرآن وأعلمه الحوف العربى.. لكن طبعا بالعافية والزعيق والشخيط… الأول كان بيخاف وبيعمل الواجب اللى أديهوله اما دلوقتى زى ما يكون مش هامه حاجة خالص أقول له ماما زعلانه فلا أجد رد فعل… كأنه بيقول لى إتفلقى!!!!
تعبنى والله الولد ده وبيضرب أخوه بعنف و كمان أشعر بسلوك أنانى بدأ يظهر عنده… بصراحه غلبت وكمان صبرى قليل معاهم ومش قادرة ألعب معاهم وأتعامل معاهم كويس… خايفه على ولادى فى الغربه وأشعر أنى أتصرف بجنون… معلش طولت عليكم بس لو حد عنده حل … أو لو واحدة كانت فى مثل ظروفى يا ريت تقول لى عملت إيه؟ أنا مش عاوزة ولادى يكرهونى أكتر من كده … ولكم منى جزيل الشكر ومن الله خير الجزاء
التصنيفات
