الساعة 10 مساء
**
يجلس كالعادة إخوتى الصغار ( محمود وعبد الرحمن )
للسهر على التلفاز….
ولسوء حظهم أو لحسنه يدخل عليهم زيــاد ( ابن شقيقتى
3 سنين )….
يراهم مندمجون مع فيلم عربى
يخرج صارخــــا
_ ماما ماما محمود وعبده بيشوفوا شيطان ….!!!!
تدخل شقيقتى لتغير القناة ويحدث الجدال اليومى بينهم
محمود
_ ماليش دعوة عايز أكمل الفيلم خرجى زياد
شقيقتى
_ ما هو مش راضى يخرج لما يخرج شغل الى انت عايزه
عبد الرحمن
_يعنى نعمل إيه مش نشوف التليفزيون علشان خاطره
وبعد جدال وبكاء تمسك أختى الريموت لتأتى بقناة (….. ) وبها طفل صغير يقرأ القرأن
تقول شقيقتى ( لجذب أنتباه زياد إلى الطفل ) :
_ ماشاء الله ما شاء الله طفل جميل حافظ كلام ربنا
*************
الساعة 1 بعد منتصف الليل
شقيقتى و زياد..
_
يا زياد نام بقى بُص ( مشيرة الى الشباك الظاهر من
خلاله حلكة وسواد الليل ) الناس نامت والشمس نامت
والقطط نامت كله نام..
يرد زياد قائلا :
_يعنى أعمل إيه يا ماما رجلى عايزه تمشى أسيبها يعنى تقعد وتعيط,…..؟؟؟!!!
*************
الساعة 7 صباحا
زياد
_ماما ماما إصحى بصى يا ماما ( مشيرا الى الشباك )
الناس صحيت والشمس صحيت والقطط صحيت كله
صحى …!!!!
*************
الساعة 9 صباحا
يمسك زياد بريموت التلفزيون ويشعله لتظهر قناة الأفلام
فينظر بطرف خفى لشقيقتى بدون أن يحول القناة
فقالت بحدة
_زيـــــــــــــــــــــــــــاد
فيغير القناة ليلاقى صورة طفل يأكل فتقول شقيقتى :
_ ما شاء الله ما شاء الله هيأكل ويكبر لمامته….!!
****************
الساعة 3 عصرا
زياد
_ماما قولى آه.
_ليه يا زياد ..؟؟!
_ بس قولى آه..
_على إيه يا زياد…؟؟!
_إنتِ بتحبينى …؟؟!
آه يا زياد
فيتجه زياد إلى باب الشقة بعد إرتداء حذائه …
تنادية شقيقتى …
_ زياد رايح فين
_نازل ألعب مع محمود وعبده
_ ياسلام!!!!!!!!!!!!!!!1
_ مش إنتِ قلتِ آه…..!!!!!!!!!!!
**************
الساعة 5 عصرا
زياد وأنا وأدم
_ خالتو
_ نعم يا زيزو
_هو أدم مش ليه سنان ولا بيشمى ليه ..؟؟!!
_علشان هو صغير
_ هو هيكبر إمتى …؟؟؟؟!!!!
_ لما يأكل هيكبر.
_يعنى لما يأكل كــــــــــتير أوى هيبقى كبير
_آآه يا زياد
ونام أدم وخرجنا وبعد نصف ساعة تناهى إلى مسامعى صوت
صراااااااااااخ أدم
هرولت إليه لأجد زياد العزيز يضع فى فاه قطعة
مكرونه……….!!!!!!!
_ زياد بتعمل إيه…….؟؟؟؟؟؟؟؟؟؟؟!!!!!!!!!!
_ بأكل أدم علشان يكبر ويمشى بقى …..!!!!!!!!!!!!!!
***************
فى المساء يشاهد محمود وعبد الرحمن التلفاز ( فيلم أجنبى
رعب عبارة عن وحش بيأكل فى البنى أدمين )
يدخل زياد وينبهر بذلك الوحش
بعد قليل تدخل شقيقتى لكى تغير هذه القناة
وتبدأ فى الجدال مع محمود وعبد الرحمن
هنا يهتف زياد وهو مشيرا إلى الوَحش على الشاشة
_ ماشاء الله ما شاء الله بيأكل كتير وهيكبر لمامته
***
