الحمد لله ابني عارف دخل الحضانة السنة دي ومر الموضوع بسهولة وبدون مشاكل تُذكر.
وانا أيضاً اشتغلت
المشكلة بقى عندي تنقسم لقسمين:
عارف في الحضانة أول عشر أيام كان بيقول للمدرسة بتاعته عاوز الحمام والدادة بتدخله ، لكن دلوقتي بدأ يتلهي باللعب مع أصحابه وينسى يقول …
أنا تضايقت بس رحت للمدرسة بتاعته واتفقت معاها انها تخليه يروح الحمام كل ساعتين لغاية مايتعود يقول تاني.
أما مروان الصغير سنة ونصف ، كنت في البيت بدات أعوده على الحمام وتقريباً بالنهار كان بيقول كل ماكان بيعوز يعمل.
بس للأسف قبل بدأ الدراسة بأسبوع نقلت من شقتي لشقة جديدة وبعدين بدأت الدراسة وعملي مع بعض (أعمل في نفس مدرسة عارف ابني ودخلت مروان baby class).
طبعاً خلال الفترة دي اتشغلت ومروان رجع تاني ينسى ويعمل في البامبرز.
ماعنديش أجازة غير الخميس والجمعة وفيهم بحاول أرجع مروان تاني يقول لما يعوز حمام.
مش عارفة أعمل إيه؟
ياريت تفيدوني بخبراتكم.
