أية رأيكم لو كل واحد فينا تحكى عن موقف مضحك حصل لها بسبب زيادة وزنها ومن بعدها قررت أنها تحاول تعمل رجيم علىَ وعسىَ شىء يتغير وتحصل المعجزة ويتحرك الميزان ولو خمسة كيلو بس
أنا أبتدى بنفسى :
مرة كنت ذاهبة للنادى مع أولادى وكنت مرتدية بنطلون وبلوزة وبعد نزولى من البيت مشيت حوالى 200متر حتى وصلت للشارع العمومى لأخذ تاكسى ، لحد كدة وكل شىء تمام………
ووقفت تاكسى وركبت بكل ثقة وشموخ وانا واخدة راحتى قوى (تقوليش سندريلا ولا فراشة بتتنطط) وإذا فجأة وبمجرد ما ركبت التاكسى البنطلون أنقطع من الخياطة بفتحة طولها 20 سم
ياخرابى هعمل أية يا ترى أطلب من السواق يرجع البيت بعد ما قلت له على النادى يا أسطى ،ولا أطلب منه يرجع على البيت بحجة أنى نسيت حاجة ؟؟؟؟؟؟؟؟؟؟وبالتالى الناس فى الشارع وكل سكان العمارة فى المدخل وعلى السلم هيشوفوا إلى عمرهم ما شافوة فى حياتهم هههههههههه
ولا أروح النادى وأحاول أشترى أبرة وخيط وأخيط البنطلون فى حمام النادى ؟؟؟؟؟؟؟
وبعد تفكير عميق طول الطريق أفتكرت أن أمام بوابة النادى يوجد محل لبيع الملابس وغالبا بيكون المحل فى هذا الوقت من اليوم شبة خالى من الزبائن قلت فى نفسى أنزل أمامة وأدخل أشترى بنطلون جديد وألبسة فى المحل وبالفعل طلبت من سواق التاكسى يقف أمام المحل ونزلت من التاكسى وأنا مخبية فضيحتى من الأمام بشنطة النادى وطلبت من بنتى تمشى من ورائى علشان محدش يبص عليا .
وبالفعل دخلت المحل ، قابلتنى العاملة فى المحل وبكل زوق قالت لى تأمرى بأية حضرتك ، قلت لها وبكل ثقة البنطلونات فين لو سمحتى ، وكان ردها مثل الصاعقة من السماء ( معندناش مقاس حضرتك يا مدام ) ووجدت نفسى أسكت لحظة ثم أقتربت منها وبصوت منخفض قلت لها أبرة وخيط ، نظرت لى نظرة عمرى ما أنساها وقالت لى نعم حضرتك ، قلت لها أية بنطلونى أنقطع وعايزة أبرة وخيط ، وبالفعل أعطتنى المطلوب وسمحت لى بدخول البروفة وخيطت البنطلون وخرجت من المحل وفى هذه اللحظة قررت أنى لازم يكون لى موقف حازم فى مسألة وزنى الزائد بعد هذا الكم من الأحراج والذل
وبالفعل أتبعت رجيم كميائى سريع ساعدنى على نزول وزنى 13 كيلو فى 17 يوم ، وما زلت محافظة عليهم حتى وقتنا هذا يعنى من حوالى سنتين
ودلوقتى مين منكم عندها موقف حصل لها بسبب وزنها الزائد بس يكون موقف مضحك كفى غم وهم وتقل دم خلونا نضحك شوية على مصيبتنا يمكن دة يخفف عننا شوية
