انا تعبت تعبت انا ماعنديش اصدقاء غير خطيبي بس يصعب عليا من كتر مشاكلي فقلت اكيد انتم صدركم رحب وحيسعني انشاء الله..
مشكلتي بدأت من 20 سنة وعايشه فيها الي الان .. بدات تفرقة أبي في المعاملة بيني وبين اختي الكبيرة وضربي بسببها .. هي بإختصار دلوعة بابا وماما ويوم ما اتجوزت حمدت ربنا لأن بابا مش حيضربني تاني بيعملها احسن مني بحجة انها مش في جمالي ولازم يعوض النقص اللي عندها الا ان جعلها من شياطين الانس والله ياما اتبلت عليا بأشياء كذب ، لايمكن انسي يوم ما بابا ضربني علي وجهي عشان لاقيته قاعد مع واحدة وقلت لماما ولا حنسي كم مرة ضربني فيها عشان اختي الكبيرة واخرها في رمضان اللي فات عشان غلطت فيه وانا قلتلها يا بنتي اتقي الله انا عملتلك ايه؟ ضربني في الحمام والله ويومها توقف عن ضربي لما لقي نفسه كان حيكسرلي رقبتي ويموتني ولا يوم ماغصبني اني اتخطب لواحد ماهنش عليه انه يسال عنه قبل مايوافق عليه كل ده عشان غني ولا حنسي المأساة اللي انا عشتها لأكثر من 6 اشهر عشان يوافق اني ماكملش معاه وحبسنس فس البيت وفي غرفتي ولا يوم ماوافق علي خطوبتي وكتب كتابي علي واحد من كام شهر ايضا من غير ما يسأل عنه وعن اهله وطلقني منه بعد 5 ايام عشان اكتشف انه ماعندوش اخلاق .. ليه ؟؟؟؟
المهم اختي اتجوزت وسافرت وبتنزلنا كل كام شهر وفي كل مرة لازم تعمل فيه مصيبة شكل والله العظيم ..
بس قلت الحمد لله اني اترحمت شويه وان المصائب مش بتحصلي كل يوم زي ماكان بيحصل قبل ماتتجوز وياما كانت توقع بيني وبين امي واللي حيقتلني ان امي في كل مرة تيجي عليا وتدافع عنها وتكذبني واحلفلهم اني بريئة بس والله مافيش حد بيسمعني ..(دايما اقول في نفسي ان البني أدم المحترم المتدين مظلوم والخبيث هو اللي بيتصدق) انا الحمد لله متدينة والوحيدة الي متدينة في البيت بشهادة كل الناس المحترمة بس اللي تعرفنا ..
سافرت اختي الكبيرة وكنت انا واختي الصغيرة بيضربوا بينا المثل في الحب والأخوة لحد ما اختي الكبيرة اتجوزت والصغيرة اتخطبت وابتدت المعاملة تتغير بقت بتعمل معايا الحاجات اللي كانت بتستنكرها من اختي الكبيرة بقي بتغير علي خطيبها مني مع اني والله العظيم محترمة جدا وفي حالي وابتدين في دوامة تانية الاولي كانت اختي الكبيرة وابي والتانية اللي انا عايشة فيها لحد دلوقتي هي اختي الصغيرة وامي .. امي اعادت الكره بس مع الصغيرة .. والله مش بتصدقني قي حاجة ودايما بتنصرها عليه .. كل ده عشان انا متدينه ..ابويا ما اكتر سب الدين في فمه وابتدا يصلي من حوالي شهرين مع انه حج وامي لابسة الحجاب عشان السن بس وبتصلي من غير ما تغطي شعرها واختي لا مانع لديها انها تعرف ده وتكلم ده من غير علم خطيبها طبعا .. وامي بتعاملني وحش علشان شايفاني مش بخون خطيبي ودايما تنصحني نصائح غريبة اني امشيه علي عجين مايلغبطهوش وهو اللي يسمع كلامك مش انتي اللي تسمعي كلامه ومهما قلتلها اد ايه البني أدم ده بيحبني ومايستحقش مني ده مفيش فايدة تخاصمني وتحب اختي الصغيرة اللي بتعمل بنصايحها .. علي فكرة انا غير محجبة لبست الحجاب فوق ال6 مرات وابويا بيجعلني اخلعه غصب مش حقولكم كم الإيذاء النفسي والجسدي اللي تعرضت له ، وكانت اخر مرة لبسته من ورا اهلي والله كنت وانا رايحه شغلي البسه في السانسير واخلعه وانا راجعه في السانسير ايضا ومرة من المرات كنت بخلعه ونسيت اضغط زر استوب والاسانسير اتسحب مالحقتش اضع الحجاب تاني كنت راجعة البيت والامن شافوني وانا بشعري والراجل اللي ركب معايا فضل ينظر لي نظرات فظيعة لانه اعتقد اني البسه قبل ما اطلع البيت واني كنت خلعاه في الشارع وكان نفسي اقوله الحقيقة بس قلت حسبي ربي وكانت نهاية الموضوع ان ابويا عرف وحلف بالطلاق اني لازم اخلعه والباقي انتم طبعا عرفتوه .. وخلعت الحجاب .. بس الحمد لله كان فيه شاب عايز يتقدملي قبل موضوع كتب الكتاب ده وشافني وقتها بالحجاب وهو متدين جدا وهو شيخ اساسا ولما اتطلقت عرف اللي حصلي وشافني اني خلعت الحجاب ورغم كده وقف جنبي لانه عرف معدني كويس واتقدم لاهلي وربنا يكرمنا ونتجوز اخر السنة .. مفيش حد بيسمعني غيره والله !
تصدقوا مرة دخلت لابويا غرفته وبكيت بشدة وقلتله يا بابا حس بيه انا حسه اني غريبة معاكم اسمعني ولو لمرة واحدة .. تفتكروا كان رده ايه؟ كان في منهي الحنان قالي اطلعي برة يا بت ال.. ، اما مي بقي عمرها مااخذتني في حضنها غير مرات تعد علي صوابع اليد الواحدة .. قلت لماما من ايام انتي عارفة انا بحبك اد ايه انا ببوس التراب اللي بتمشي عليه ماتقسيش عليا عشان احنا بشر مش ملايكة وانا بخاف اشيل منك عشان خاطري عامليني كويس .. لا حياة لمن تنادي .. انا الان بعترف اني اكره ماما والله مابقاش عندي خلق اني اعاتبها او اعاتب بابا لأن بكل بساطة مفيش حد بيسمع .. ووعدت نفسي الليلة الماضية اني عمري ماحكون ام زي ماما عمري ما حكرر غلطة امي معايا مع اولادي ولو حبقي كده يبقي ماستقش ان ربنا يرزقني بأطفال .. خلاص كده هي دي العلامات الصغرير ليوم القيامة البنت تكره امها ..
التصنيفات
